பாவற்குளத்து மண் பெற்றெடுத்த பசுந்தமிழ்க் காளை – உன்
பார்வை பட்ட இடமெல்லாம் தமிழினம் கண்டது நிமிர்வு!
தாய் நிலத்தின் மேனி சிதைத்த சிங்களப் பகையை
வேரறுக்க எழுந்தாயே வன்னி நிலத்தின் வேங்கையாய்!
கல்வியின் ஏடுகளைக் காலம் புரட்டிய வேளையிலே
காவலற்றுக் கிடந்தது உன் இனத்தின் உயிர்கள்!
உழுதுண்டு வாழ்ந்த மக்கள் உதிரம் சிந்துவதைக் கண்டு
புலியாக உருவெடுத்தாய் இந்தியப் பாசறையின் வீரத்தோடு!
பயிற்சி பெற்ற கரம் ஏந்தியதோ நவீன ஆயுதம் – அது
ஆதிக்கச் சக்திகளுக்குத் தந்ததோ பெரும் அச்சம்!
புதிய போராளிகளைப் புடம்போட்டு வளர்த்த குருவே
தென்னியங்குளப் பாசறையில் நீ காட்டியது வீரவழி!
கொக்குளாய் முதல் பூனகரி வரை உன் காலடித்தடங்கள்
ஒட்டுசுட்டான் களமெங்கும் உன் போர்த்திறத்தின் முழக்கங்கள்!
ஆரம்பக் காலத்தின் அசாத்தியத் துணிச்சல் கொண்டவனே
வெற்றிச் சரித்திரத்தின் வேராக நின்ற ஜெயமண்ணாவே!
யாழ் மண் ‘லிபரேசன்’ நடவடிக்கையில் துடித்தபோது
மக்களின் மனங்களில் நம்பிக்கையை விதைத்தாய்!
தடைகளைத் தகர்த்துத் தலைமைக்குத் துணையாகி
களமுனைகளில் காயங்களைச் சுமந்து நின்ற கவசமே!
மேடைப்பேச்சு அறியாத செயல்வீரன் நீ – உன்
மௌனமான திட்டமிடல்கள் எதிரிக்குப் பெரும் இடி!
தலைவனின் வேதம் ‘சொல்லுக்கு முன் செயல்’ என்பார்
அதை வாழ்ந்துகாட்டிய வரலாற்று நாயகன் நீயே!
வன்னிக் காடுகளின் மூலை முடுக்கெல்லாம் உனக்கறிமுகம்
மறைந்திருந்து தாக்கும் கலையில் நீயோர் அறிவுமுகம்!
எத்தனையோ தாக்குதல்கள் உன் மூளையில் உதித்தவை
எதிரியின் கோட்டைகளை உன்னால் சரிந்தவை பல!
போர்க்களத்தில் நீ நின்றால் போராளிகளுக்குத் தெம்பு
எதிரியின் வியூகங்களை உடைப்பது உன் தனிப் பண்பு!
ஜெயம் என்ற பெயருக்கேற்ப வெற்றிகளைத் தந்தாயே
தமிழீழத்தின் விடியலுக்காய் உன்னையே தந்தாயே!
அலங்காரப் புகழோ கவர்ச்சி வேடமோ உனக்கில்லை
விடுதலை ஒன்றே உன் வாழ்வின் இலக்கானது!
ஆட்பதிவு முதல் ஆயுதப் போர் வரை அனைத்திலும்
நீ செய்த பங்களிப்பு வரலாற்றின் அழியாத கல்வெட்டு!
மரணம் உன் மேனியைத் தீண்டியிருக்கலாம் – ஆனால்
மறவர் நெஞ்சங்களில் நீ என்றும் மரணிப்பதில்லை!
பிரிகேடியர் ஜெயம் எனும் வீரத்தின் விலாசமே
ஈழமண் உள்ளவரை உன் புகழ்பாடும் இந்தத் தமிழினம்!
ஊடகவியலாளர் &
உளவளத்துணையாளர் (Counsellor)
